Жыргалбектин жаңы ыры

КҮЧ 

Сүйлөшсөң сөз учугун кызытканга,
Сүйүшсөң — кош жүрөктү ысытканга,
Күч керек, күндө кылган иштериңе,
Күч керек, бул дүйнөгө кызыкканга.

Ааламдын айтаар сөзү анык турат.
Агарып аткан таңда жанып турат.
Күн дагы, бул дүйнөнү нечен кылым
Күч топтоп келген үчүн жарык кылат.

Атаарда — дүрмөтүңдү октош керек,
Алыска аттанаарда — токтош керек.
Ааламга Күндөй болуп жаныш үчүн
Ааламдын асыл күчүн топтош керек.

Ж. Касаболотов

Соц тармактар:

Добавить комментарий